مُـجرد احاديث !

..





والله ماشفت اتفه من ذا الانسانه
المشكلة اني محجوره معها
فوق الهم همين .. والله
اول ماكنت اصدق انو فيه ناس تافهين
لدرجة هذي! لكن هي اثبتت لي
وصدقت وامنت بالله.
ياناس سولفها تافه وتفكيرها اتفه
كلها على بعضها كتلة من التفاهه
ومحور حديثها من خمس
سنين عن الناس ماتذكر انها
تكلمت عن نفسها او عن افكارها
او عن شيء هي سوته
لو ان شاء الله
تسولف لي عن طبخه هي طبختها
ماعندي مشكله اسمعها ولو تعيدها
الفين مره لكن تفكني وترحمني
من سوالفها المشكلة حتى الناس
الي هي تهرج فيهم والله مايسون
جناح ذبانه .. هالفترة بس
ابيها تكرمني بسكوتها وترحمني لان
مخي انهلك .. وانا مجاهده ومحاوله
احافظ على هدوء وسكينة
البيت واستغل هالاوقات
ما اقول الا
الله يلعن الفراغ الي هي تعيشه
وانا الي ادفع ثمنه.

..



أحبك طواري بس .. ماعاد أحبك خل !

..




ودي ارجع التويتر
بس يلعب بنفسيتي الله ياخذه
لما افتحه احس الدنيا مو بخير
واحس الاوضاع مو مستقرة
واحس الفساد يطغى على الخير
واحس العالم كلهم مثل الحيوانات  
والكل منحط الا من رحم ربي.
والي فاقع مرارتي زيادة
يوم ٦ برمضان نزلت
تغريدة بتاق وضربت ضربة مو طبيعية
وجوالي جلس يتراعد ويرجف
من هول الصدمة وحومة الكبد من
المنشن الي جاني
حذفت التويتر المشكلة
صار مالي خاطر ارجعه هو انا من يوم
يومي كذا مع التويتر خصوصا مو متقبله انه
يكون بجوالي ٢٤ ساعة مثل الواتساب
او البرامج الثانية لازم احذفه شهر شهرين
ثلاث مرة حذفته سنه
لكن يجي اليوم الي  ارضى عليه وارجعه
لكن بسرعة اسخط عليه واحذفه
وهكذا ...

..



تعبانه احس
بآلام غريبة تصحيني
من نومتي لكن مالها طب
وهالشيء قاعد يلعب بنفسيتي
اذا النوم قل النفسية تصير
زباله واذا النفسيه صارت زباله
تبدأ المشاكل وتبدأ الاعصاب تفقد
سيطرتها على النفس.
الحمدالله ان فيه ربي ومطلع على
كل شيء الحمدالله حمدا يليق
بجلاله وعظيم سلطانه ..

..



وحده من البنات دايم تشتكي
لي من الصدمات الي تتعرض
لها من الناس القريبين منها
احيانا تكون تافهه بالنسبة لي
لكن ما احب اصغر مشاكل الناس
احب اعطي الشخص ردة الفعل
الي يبيها خصوصا لما يكون مخذول.
ما ابي اسوي نفسي عجوز لكن والله
تذكرني بنفسي أول
المهم اني دايم اقول لها
لاتكبرّين هقاويك بأحد عشان
تكون عندك حصانة ضد الصدمات .. طبعا
كلامي هذا ما ينوخذ بعين الاعتبار بالعكس
تنسى مشكلتها ونخش في مشكلة
ليش ما اكبر هقوتي في احد؟ وليش وليش
وستين ليش؟؟
والله لو كل الناس مايكبرون هقاويهم
بنعيش حياة مستتبه وهادية
ونتقبل كل شيء بصدر رحب
وطبعا مو كل الناس اشرار لكن هي الحياة
كذا المهم الفايدة من هذا الموضوع
لا تكبرون هقاويكم عشان تكون عندكم
حصانة وبنفس الوقت تحسون بلذة
اي شيء يصير لكم حتى وإن كان
تافهه وحتى لو هقوتكم
وحقكم انتم اكبر من كذا

جوآآآآهر كتب:..



وحده من البنات دايم تشتكي
لي من الصدمات الي تتعرض
لها من الناس القريبين منها
احيانا تكون تافهه بالنسبة لي
لكن ما احب اصغر مشاكل الناس
احب اعطي الشخص ردة الفعل
الي يبيها خصوصا لما يكون مخذول.
ما ابي اسوي نفسي عجوز لكن والله
تذكرني بنفسي أول
المهم اني دايم اقول لها
لاتكبرّين هقاويك بأحد عشان
تكون عندك حصانة ضد الصدمات .. طبعا
كلامي هذا ما ينوخذ بعين الاعتبار بالعكس
تنسى مشكلتها ونخش في مشكلة
ليش ما اكبر هقوتي في احد؟ وليش وليش
وستين ليش؟؟
والله لو كل الناس مايكبرون هقاويهم
بنعيش حياة مستتبه وهادية
ونتقبل كل شيء بصدر رحب
وطبعا مو كل الناس اشرار لكن هي الحياة
كذا المهم الفايدة من هذا الموضوع
لا تكبرون هقاويكم عشان تكون عندكم
حصانة وبنفس الوقت تحسون بلذة
اي شيء يصير لكم حتى وإن كان
تافهه وحتى لو هقوتكم
وحقكم انتم اكبر من كذا

قوليلها انتي تتعاملين مع بشر على هذه الارض مش مع ملائكة

مثلما عندي قاعدة هي ( لولا الذنوب لما تقربنا من الله) فقوليلها ( لولا اخطاء البشر لما عرفنا العفو والتسامح)
المضحك ان الاغلب من المسلمين يطالبون بالتسامح مع الاديان الاخرى و هم حتى لا يعرفون التسامح بينهم ولو بشق الانفس

..



تاخذني الذكرى ويلحقني هيام !

..


احسن شيء بشهر ١٠
نص الشهر يكون فيه
فطور وقومه الصباح والكل صاحي
هو الشهر الوحيد الي احسه حق
فطورات بس مشكلته ثقيل وطويل
ومتبارك بزيادة مدري لاني
اصحى من الصباح او هو كذا ثقيل

..



اشمئز من الشخص الي يحاول
يظهر لك انه انسان مافيه ذرة
انسانية ولا رحمه ولا عطف
يحاول يوصل لك انه جبله
وجلف وصلف
حتى وان كان هو بالحقيقة
عكس كذا
تكذب علي وتظهر لي انك
انسان فيك اهم صفة بالانسان
الطبيعي ارحم لي من انك
تمثل هذا الدور الكريهه معي
الي مصيرك بتقنعني فيه
وبكرهك وبزاوع اذا شفتك
قدام عيني.
انك تكون شخص عديم
رحمة ومتبلد نفس لما تكون
شخص جبان نفس مانشمئز
من الجبان والخواف نشمئز
من عديم الرحمة .. الظاهر
الناس بدو ينسون كيف يصيرون
اوادم طبيعين بدون مبالغة
ب عواطف الشر و الخير.

..




دوروا لي عمر ثاني هالعمر ماخوذ خيره  !

..




كل شيء يجي عندهم بالغصب
والمطالب فيهم طاقة
على الشر غريبة
الظاهر سيناريوا قبل عام الالفين
بعشرين سنه عاجبهم.
كنت اول استغرب اقول كيف يحطون
عينهم بعيني الحين لا صرت
ابي الستر والسلامه مافيه شيء بالمطالب
والغصايب يصير ومافيني من الضعف
مثقال ذرة لكن ابي احافظ على
بعض القلوب.

..




عزاي انك رجاي العذب لو كل الدروب عثور
وصلت او ماوصلت اعرفك ما انت منتظر غيري !

..


اكره السفر لاني ما قدر
اهرب لنوم بأي وقت واي ساعة  
مضطرة اصحى مع الناس وانام معهم

..



اول كان التزبيد ينفع ويجيب
نتائج الحين ماينفع
الناس صابهم تبلد
تزبد لهم ويلحقونك!
يحدونك على الردئ الي انت
ماودك فيه والله ماودي ازبد
ولا ودي احرج لكن يجيبوني
من اقصاي.

..



نقطة ضعفي الصوت والله صوته
قادر يحطم كل العتب والزعل
الي بقلبي مهما كان حجمه !

..


قبل ساعتين بعد ماتروشت
رشيت من عطر ابوي
وندمت ندم مو طبيعي
راسي بينفجر وانكتمت
الله يسامح ابوي بس  
لا ومن زود الفلاحه رشيت على
شعري لو ملابسي كان غيرت
وانحلت المشكلة لكن الشعر
تمسك ريحت العطر فيه بقوة
خصوصا هالنوعية .. جاني ارق
من ذا الريحه ماقول إلا
ياشين مشاعر الليل
الي تخليك تسوي اشياء تندم عليها.

..





تنتخي بي وانا قدامها منهزم
ماهو ضعف البلا في قوة عيونها
قالت : اه وتحرك فارسٍ مانهزم
واحتشد جيش عاشقها ومجنونها  



يالله صباح خير على ذا الرجعه
الحلوه والقوية من مخاوي الليل  

..



الاشخاص الكويسين نفسيتهم خايسة !
يعني عادي عندهم ينسفون كل
طيبتهم اذا تعكر مزاجهم من اي شيء.
عشان كذا انا ارتاب من النوعيات هذي
ما احب الاحتكاك فيهم
برغم ان منفعتهم كبيرة  .. لاني
بكل بساطة عارفه اني مستحيل اتحمل
الوجهه الثاني حقهم

..


والله المنتدى ذا مريب

على العموم كنت داخله عشان
اقول بين العفوية والفظاظة
خيط رفيع لاتكون شخص فظ
وتقول انا عفوي !
كرهت العفوية بسبب هالعينات
الي شوهوا مفهوم العفوية.

..



دائما تجي بالوقت الضايع
وتتكلم بالوقت الضايع
وتفعل بالوقت الضايع.
والله احس وجودها صار ماله داعي
مدري شتبي ؟!
هي والضياع الي عايشته من عام
الالفين.

مساء الخير بتوقيتي
بالمناسبة اكثر شخص وحشتني سواليفه هي سواليفك جواهر اتمنى انك بخير وعيد سعيد يارب

.S كتب:مساء الخير بتوقيتي
بالمناسبة اكثر شخص وحشتني سواليفه هي سواليفك جواهر اتمنى انك بخير وعيد سعيد يارب

يابعد قلبي ياسو
ينعاد علينا وعليك يارب.

..


حزينة من اجواء الرياض
وش ذا متنا حر ورطوبة
وغبار .. شكلي بشتري
لي كوخ فالجنوب فوق جبل
وبالاجازة ارروح فيه
لان جد نفسيتي بدت تتعب من ذا الاجواء

..



قاعده اتهرب من مواعيدي
خلصت اعذاري ولا به جديد

جوآآآآهر كتب:..




يـ بعيد الوصل ويـ بخته قريبك
جف صدري ينتظر صوت الرعد
يـ مطر عمري جفافي يرتوي بك !
انت غيثه وانت له شمسه بعد
ليت شوقي لو يهزك لو يصيبك
شف شراره بـ الحنايا ما برد !
ليت بُعدك كل ما زاد بـ يعيبك
نجمك الي لو تجاهلته صعد
تحسبني افقدك لحظة مغيبك ؟
مافقدك وحدك انا افقد بلد.

..

مايعوض اي عدد غيبة حبيبك
الوحيد الي بكفه عن عدد.



وتوته توته خلصت الحتوته.