مُـجرد احاديث !

..

سبحان الله بيئة الشغل تأثر على
الشخص بشكل كبير
كان شخص مختلف تماما
لكن بمجرد ماتوظف بمكان مختلط
صارت نظرته سوداويه وغبية
الله يرحم ايام اول كان اقرب
قريب واكثر شخص مناسب
اني اتكلم معه ويفهم علي الحين
احس فيه مسافة كبيرة واحس لو اتكلم
من هنا لبكرا ماراح يتقبل ولا يفهم.
لو كلنا نقيس الامور كذا
عز الله ماتغيرنا ولا تقدمنا خطوة
لقدام !

..




صحيت جمرة وذاب الشمع والسكر
وشلون ماتذكرك وتمر في بالي
ياكثر احبك في قلبي والغرام اكثر
وتخيل شكثر احبك وانت غربالي؟
يحق لك ياصغير السن تتكبر
الا على الي يحبك يابعد حالي
في بسمتك يضحك الرمان للمرمر
وبعد يغار الشهد من ريقها الحالي
كل الشوارع تمرك يالحرير الحر
ياتل قلبي على لاماك من تالي
رح وين ماتشتهي رح قد ماتقدر
انا اول الناس في قلبك وانا التالي
ياخلطت المسك والريحان والعنبر
الريح تستأذنك ياطيب الغالي
كانك تغليت تستاهل وانا اتصبر
على تغليك والغالي هو الغالي

كتبتها وانا مستمتعه مع انها طويله

سبحان الله من كنت صغيرة وانا
احب الاغاني للاسف اذا غنى
لي احد او شغل لي غنية
افغر وشياطيني تنطرب
اذني تستصيغ الاغاني بشكل
غريب الله يفكني منها ماتجيب الا الهموم
وتصحي الجمرة ويذوب الشمع والسكر
كان يدندنها واحد من عيال عمي زمان
وامس طحت عليها فجأة
سقى الله ذيك الايام خلاص كبرت
وماعاد صرت اتكبر ولا صار الرمان
يضحك للمرمر
ورحت قد ماقدر ولا انت اول الناس
في قلبي ولا انت التالي
ولكن كنت افضل الخايسين بالنسبة
لي والخيار المقبول دائماً.

اول لما كان شعري طويل
ابتلش فيه اذا جيت انام
يحوم كبدي الحين لما قصيته
صرت ابلش براسي بكره
وبرقبتي فيني نوم بس مادري
كيف اتصرف مع رقبتي وراسي
اول مرا اشوف احد مبتلش
براسه ورقبته مدري صراحة
وش اقول بس سبحان الله انا
احساسي جدا عالي
الفترة الي راحت صار موقف
مصيري المهم اني حليته
ومن صار هذا الموقف وانا عارفه
انو مامن وراه خير مع اني حليته
بالشكل الصح لكن عارفه له
تتبعات منحوسه.
هذي سالفه ثانية مالها دخل بسالفة
راسي ورقبتي

..




قبل فترة كان عندي موعد ضروري
واتصلت على المستشفى وسألت
عن الدكتور وقالو موجود
اصلا انا متأكدة انه موجود لكن
دايم ادور حجة اقول لعل وعسى
يقولون مو موجود عشان يرتاح ضميري
المهم اني رحت وانا حاسه اني ماراح اقابل
الدكتور فيه شعور غريب يقول لي انه
مو موجود وسبحان الله نوصل للمستشفى
ويقولون لنا الرسبشن انه حصل له ظرف وطلع!
ماتذكر اني حسيت بشيء وماصار
صرت امقت احساسي لانه يخليني
اعيش الحدث واستشعره قبل يجي وقته.

..


ماشاء الله علي .. جوي عليل
مع ذا الظهريه
خلصت محاضراتي وغسلت
الحنا الي من الفجر ناقعة براسي
ومحومه كبدي .. وهالحين
جالسه بالحوش عشان
يجف لو شوي .. لاني
وحده اكره تجفيف الاستشوار
كره الويل .. وبيدي الحلوه
شاني بارد يسرسح جابه لي
حبيب قلبي الي انا بحسبة
امه
واسمع لخالد عبدالرحمن
وكل دقيقتين الفح لا ارادياً
الله الله.

..



شكل كان يُجرى لي اختبار عاطفي
من احدهم .. ويبدو لي
إني فشلت فيه  

..



ياصبر السعودية قيادةً وشعباً
على بعض الحمير الناهقه
والكلاب الظالة
وشوية الخونه المُتسلقين.

الله يحفظ الاحرار ويبيد الخونه
والمُستعبدين بسس
الموضوع استفحل بشكل
غريب.

..

جوآآآآهر كتب:..



شكل كان يُجرى لي اختبار عاطفي
من احدهم .. ويبدو لي
إني فشلت فيه  

ماجستير بالاختبارات العاطفية ارحبي B:

Fahod_31 كتب:

جوآآآآهر كتب:..



شكل كان يُجرى لي اختبار عاطفي
من احدهم .. ويبدو لي
إني فشلت فيه  

ماجستير بالاختبارات العاطفية ارحبي B:

هههههههههه البقى

..


اجواء الرياض تجنن ياليتها
تبتل كذا ومايجي البرد القوي

٠٠


سبحان الله دايم حقات
الامن يجون همجيات
سوء بمكان عام او خاص
عندنا بالجامعة حقات الامن
همجيات وكل وحده لحجيه
اكثر من الي قبلها والله ودي
اخذ قياس الحراره وانشبه
براسهم وحده وحده.
ماتشوف وجهك الا تصارخ
الحراره الكمامه البطاقه الجامعية
وصراخ كنهم بحراج ياكلبه بنزل
اعطيني فرصة ادخل اعوذ بالله الواحد
بالقوة متماسك!

..


يـ تشرينَ في بيروت
ويـ نيسان في حيّفا
أُحبكِ إنها عطشٌ
بـ قلبي دون أن يُروى

ويـ بلقيس عند نزار
كُل الحُب يـ ليلى
انا المجنون يـ ليلى
وحالي بعدكِ يُرثى !

ولا أبى بغير "الميم" أن اعشق
وغير "الميم" أن اهوى
أُحبكِ .. ليس لي شغفٌ بـ هذي
الأرض الا انتِ
ولا اتصور الدُنيا
بدُنكِ أن تُرى دُنيا
ولا المعنى بلا عينيكِ يـ انتِ
يُتمم صورة المعنى.



ويح قلبي بس  

..


الان جالسه اعاني من الجلسه الي بدون
هدف احاول اقنع نفسي تتنحنح
وتقوم زي الشاطره وتنام
بس ماش الوضع مزري عجزت اقنعني!
مدري هو كسل ولا طقوسي حقت
ماقبل النوم هي الي تحوم كبدي وتخليني
امدد السهره .. مع انها فيني فيني وبسويها
غصب ولو ماسويتها ما ارتاح واحس بنقص
الا اني اسويها وانا مكرهه
اللهم الصبر بسس

..



يارب الي ببالي مايصير

..



بقى قلبي الي ما ذبحته وهو منصاب
انا ادري تبي تستوطنه يومك تخليه !


١:٢٣ص

..



لما شخص يعزم نفسه عليك
ويخليك تكنسل كل امورك وتتفرغ
له ولعزيمته ويتأخر
اكثر من ساعة برغم ان الطريق
مايخذ منه حتى ثلاث دقايق
هنا يكون ذا الشخص قليل
ادب وعديم ذوق وقح
ولا مو شيء غريب يعني
هذي الحركة مو اول مره
ولا عاشر مره.
ياكرهي لحركات الملحجه
احجزك من بدري .. ابو ذا الوجه
صدق الي يستحون ويقدرون انقرضو.

..




من يوم قفت راح قلبي معاها.

..


الأنسان ما يستشعر
النعمة لين يفقدها
احترقت يدي اليمين وصرت استخدم
اليسار بس والله
عذاب ابسط الامور
تاخذ مني وقت وجهد
الحمدالله حتى يبلغ الحمد منتهاه
كنت متمتعه بيدين واخلص اموري
بثواني الحين اجلس دهر عشان
اخلص شغله تافهه
يارب لا تفقدنا صحتنا وعافيتنا بس.

..


كنت مشغله اليوتيوب وحاطه
تنقل تلقائي المهم طلعت
غنية كنت اسمعها زمان لما
ادخل المنتدى المهم ذكرتني
فيه وقلت اشيك
المهم الغنية مخيسه وتفشل
ذوقي كان ذوق لحوج مولعين
الحمدالله تطورت

..



لاتملون يدكم من احد
ولا تضمنون احد مهما كان.
لا تحسون انكم اكسجين الحياة
والحياة بدونك ماتنعاش وماتنحب
مهما كانت مكانتكم بحياة اي شخص
لاتعيشون الدور    
فيه ناس بمجرد ماتلاحظ
انك مسوي الاكسجين في حياتها
قادرة انها تطلعك من حياتها وكأنك
ماكنت موجود اصلا فيها.
عشان كذا لاتعيش الدور
ازعل وقت الزعل وارضى وقت الرضى
وعاتب وقت العتاب وروق وقت الروقان
وتغلى ولا تسرف بالتغلي

..




سامح الله قلبها ماكان الظن فيه خايب.

جوآآآآهر كتب:..



لاتملون يدكم من احد
ولا تضمنون احد مهما كان.
لا تحسون انكم اكسجين الحياة
والحياة بدونك ماتنعاش وماتنحب
مهما كانت مكانتكم بحياة اي شخص
لاتعيشون الدور    
فيه ناس بمجرد ماتلاحظ
انك مسوي الاكسجين في حياتها
قادرة انها تطلعك من حياتها وكأنك 6
ماكنت موجود اصلا فيها.
عشان كذا لاتعيش الدور
ازعل وقت الزعل وارضى وقت الرضى
وعاتب وقت العتاب وروق وقت الروقان
وتغلى ولا تسرف بالتغلي

كلام سليم ،،

اخبارك جوج ،، اقول شو تخصصك بالجامعه ؟

emo0on كتب:

جوآآآآهر كتب:..



لاتملون يدكم من احد
ولا تضمنون احد مهما كان.
لا تحسون انكم اكسجين الحياة
والحياة بدونك ماتنعاش وماتنحب
مهما كانت مكانتكم بحياة اي شخص
لاتعيشون الدور    
فيه ناس بمجرد ماتلاحظ
انك مسوي الاكسجين في حياتها
قادرة انها تطلعك من حياتها وكأنك 6
ماكنت موجود اصلا فيها.
عشان كذا لاتعيش الدور
ازعل وقت الزعل وارضى وقت الرضى
وعاتب وقت العتاب وروق وقت الروقان
وتغلى ولا تسرف بالتغلي

كلام سليم ،،

اخبارك جوج  ،، اقول شو تخصصك بالجامعه ؟

الحمدالله بخير .. تخصصي عربي

..



مسايس المركى وفنجال القهوه
بعد الكرف احلى حاجه برمضان